नायिका शिल्पा पोखरेल साधारण तारेखमा रिहा

काठमाडौं । बहुविवाहको मुद्दामा अदालत उपस्थित भएकी नायिका शिल्पा पोखरेल साधारण तारेखमा रिहा भएकी छन् । शुक्रवार काठमाडौं जिल्ला अदालतमा उपस्थित भएकी शिल्पाको बयान लिई थुनछेक बहस गरी शुक्रवार नै साधारण तारेखमा छाड्ने आदेश भएको हो ।

चलचित्र निर्माता छवि ओझाकी जेठी पत्नी हेमाले छवि र शिल्पाविरुद्ध बहुविवाहको उजुरी हालेकी थिइन् । सोही मुद्दामा शिल्पालाई पक्राउ गर्न जिल्ला अदालतले आदेश दिएको थियो ।

त्यसविरुद्ध शिल्पाले सर्वोच्च अदालतमा दायर गरेको निषेधाज्ञासम्बन्धी रिट न्यायाधीशद्वय ईश्वरप्रसाद खतिवडा र मनोजकुमार शर्माको इजलासले खारेज गरिदिएपछि शिल्पालाई पक्राउ गर्न बाटो खुलेको थियो । त्यसपछि पक्राउ पर्ने सक्ने डरका कारण शिल्पा आफैं अदालतमा उपस्थित भएकी थिइन् ।