माजु मन्दिर परिसरका टहरा हटाउन माग गर्दै धर्ना
काठमाडौं । काठमाडौंको पुरानो बसपार्कस्थित दुई माजु मन्दिर परिसरमा बनाइएका व्यापारिक टहराहरु तत्काल हटाउन माग गर्दै धर्ना दिइएको छ ।
मुलुककै सांस्कृतिक तथा पुरातात्विक महत्वको मन्दिर अतिक्रमण गरी व्यापारिक टहराहरु बनाएकोमा आपत्ति जनाउँदै स्थानीय सम्पदाकर्मीहरुले तत्काल टहरा हटाउन माग गर्दै बुधबार एक घण्टा मन्दिर अगाडि धर्ना दिएका हुन् ।
टुडिखेल र टुडिखेल परिसरमा रहेका सबै सम्पदाहरुमाथि गुठी संस्थानलेनै अतिक्रमण गर्न थालेपछि त्यसको विरोधमा धर्ना लगायतका कार्यक्रमलाई सुरु गर्नु परेको स्थानीयले बताएका छन् ।
सम्पदाकर्मीहरुले टँुडिखेलस्थित खुल्ला मंचमा परिसरमा बनाइएका सबै व्यापारिक टहराहरु हटाउन माग गर्दै आन्दोलनलाई निरन्तरता दिँदै आएका छन् ।
उनीहरुले दुई माजु मन्दिर परिसर भित्र बनाइएको व्यापारिक टहराहरु तत्काल नहटाए गुठी संस्थान, काठमाडौं महानगरपालिका र सम्बन्धित वडा कार्यालयविरुद्ध कडा आन्दोलन गर्न बाध्य हुने चेतावनी पनि दिएका छन् ।
उनीहरुले यस अघि खुला मंच परिसरमा बनाइएको ५२ वटा व्यापारिक टहरा हटाउन दवाव दिएपछि ती टहरा हटाइएका थिए ।