उपनिर्वाचनमा विदेशमा रहेका नेपालीलाई मतदानमा सहभागी गराउन असम्भवः निर्वाचन आयोग
काठमाडौँ । निर्वाचन आयोगले आसन्न उप–निर्वाचनका लागि विदेशमा रहेका नेपालीलाई मतदानमा सहभागी गराउन नसकिने बताएको छ ।
संसदको राज्य व्यवस्था समितिको बिहीबारको बैठकमा प्रमुख निर्वाचन आयुक्त दिनेश थपलियाले त्यसका लागि ठूलो तयारी र गृहकार्य आवश्यक रहेकोले तत्काल सम्भव नभएको बताएका हुन् ।
थपलियाले प्राविधिक हिसाबले पनि ठूलो तयारी गर्नुपर्ने भएकोले आसन्न निर्वाचनमा विदेशमा रहेका नेपालीहरुलाई सहभागी गराउन नसकिने बताए ।
तर यसपछिका निर्वाचनमा त्यो व्यवस्था लागु गर्नका लागि निर्वाचन आयोगले अध्ययन गरिरहेको उनले बताए । यसअघि सर्वाेच्च अदालतले पनि ठूलो संख्यामा नेपाली मतदाताहरु विदेशमा रहेकाले उनीहरुलाई पनि विदेशबाटै मतदानको व्यवस्था मिलाउन निर्देशनात्मक आदेश दिएको थियो ।
