प्रहरी महानिरीक्षक सिंहद्वारा प्रतिष्ठानको निरीक्षण भ्रमण
काठमाडौं । प्रहरी महानिरीक्षक धीरजप्रताप सिंहले बुधबार राष्ट्रिय प्रहरी प्रशिक्षण प्रतिष्ठान महाराजगञ्जको निरीक्षण भ्रमण गरेका छन् । भ्रमणका क्रममा उनले प्रतिष्ठानस्थित आन्तरिक कक्षा कोठा, प्रशिक्षार्थी व्यारेक, मेस, पुस्तकालयका साथै प्रहरी निरीक्षक आधारभूत तालिमका प्रशिक्षार्थीको कवाज एवं प्रतिष्ठान परिसरमा अवस्थित अपराध अनुसन्धान विद्यालयकोसमेत निरीक्षण गरेका हुन् ।
साथै प्रहरी महानिरीक्षक सिंहले प्रतिष्ठान परिसरमा वृक्षरोपणसमेत गरे । निरीक्षणपश्चात् आयोजित कार्यक्रममा प्रहरी महानिरीक्षक सिंहले नेपाल प्रहरी शिक्षालय भरतपुर, काठमाडौँ उपत्यका प्रहरी शिक्षालय महाराजगञ्ज, नेपाल प्रहरी युक्ति तालिम महाविद्यालय जर्गाह नवलपरासी र सातै प्रदेश प्रहरी तालिम केन्द्रका प्रतिनिधिलाई प्रहरी सहायक निरीक्षक र प्रहरी जवान आधारभूत तालिमको प्रशिक्षण म्यानुअल हस्तान्तरण गरे ।
समारोहमा प्रहरी महानिरीक्षक सिंहले प्रतिष्ठान परिसरमा उच्चस्तरको अनुशासन प्रस्तुत गर्न निर्देशन दिए । उनले प्रशिक्षार्थीलाई तालिमप्रति उत्प्रेरित गर्न प्रशिक्षण वातावरण, प्रशिक्षार्थीले पाउने सुविधा, प्रशिक्षण सामग्रीको उपलब्धता, प्रशिक्षार्थीप्रतिको व्यवहारलगायत तत्व हुनुपर्ने उल्लेख गर्दै प्रशिक्षणमैत्री वातावरण बनाउन प्रतिष्ठान केन्द्रित हुनुपर्नेमा जोड दिए ।
