सशस्त्र प्रहरी महानिरीक्षक खनालद्वारा झापामा सशस्त्र प्रहरी गणको उद्घाटन
काठमाडौं । सशस्त्र प्रहरी बलका महानिरीक्षक शैलेन्द्र खनालले आइतबार सशस्त्र प्रहरी बल, नेपाल नम्बर २ गण हेडक्वार्टर झापाको उद्घाटन गरेका छन् ।
२३७ जना रहने सीमा सुरक्षा कार्यालयलाई संगठन तथा व्यवस्थापन सर्वेक्षण प्रतिवेदन २०७५ अनुसार ६२१ जना रहने गरी गणको रुपमा स्तरोन्नति गरिएको हो । कार्यक्रममा महानिरीक्षक खनालले सशस्त्र प्रहरी कर्मचारीहरुलाई इमान्दार, अनुशासित, बफादार, नैतिकवान र व्यावसायिक भइ नागरिकको सेवा, सुरक्षा, सहयोग तथा उद्धारमा उच्च मनोवल र दृढ संकल्पका साथ परिचालित हुन निर्देशन दिए ।
कार्यक्रममा झापाका प्रमुख जिल्ला अधिकारी श्रवण कुमार तिमिल्सिना, सशस्त्र प्रहरी बल नेपाल नं. १ वराह वाहिनीका वाहिनीपति सशस्त्र प्रहरी नायब महानिरीक्षक वंशिराज दाहालका साथै जिल्लास्थित सुरक्षा निकायका प्रमुखहरु उपस्थित थिए ।
महानिरीक्षक खनालले आइतबारै झापा जिल्लाका जिल्ला सुरक्षा समितिका पदाधिकारीहरुसँग छलफल गरी जिल्लाको समग्र वस्तुस्थितिको बारेमा जानकारी लिएका थिए । साथै, झापा जिल्लामा रहेका सशस्त्र प्रहरी बल नेपालका बोर्डर आउट पोष्टहरुको स्थलगत निरीक्षण तथा अवलोकन गरी बिओपीमा कार्यरत कर्मचारीहरुलाई निर्देशन दिएका थिए ।
