नागरिकप्रति उत्तरदायी भई सेवा प्रवाह गर्न एआइजी पालको निर्देशन
काठमाडौं । प्रहरी अतिरिक्त महानिरीक्षक हरिबहादुर पालले आमनागरिकलाई गरिने व्यवहारले नै नागरिकले प्रहरीप्रतिको धारणा बनाउने हुनाले आमनागरिकप्रति उत्तरदायी भई सेवा प्रवाह गर्नु पर्ने बताएका छन् ।
महानगरीय प्रहरी कार्यालयको आयोजनामा शुक्रबार मातहतका कार्यालय प्रमुखहरूलाई निर्देशन दिँदै यस्तो बताएका हुन् । उनले आर्थिक अनुशासनमा शून्य सहनशिलतालाई कडाइका साथ पालना गर्न निर्देशन दिए । उनले गलत काम गरेमा आफूले कसैलाई साथ नदिने बताए ।
महिला तथा बालबालिका बृद्ध, फरक क्षमता भएकासँग सम्बन्धित घटनालाई बढी संबेदनशील भई प्राथमिकताका साथ अनुसन्धान गर्न निर्देशन समेत दिए । विश्वव्यापी रूपमा फैलिएको कोभिड १९ का कारण रोकिएका व्यवसायहरू विस्तारै सुचारू हुँदै गएकाले सुरक्षामा विशेष ध्यान दिन तथा विभिन्न बहानामा अनावश्यक हैरानी नदिन समेत निर्देशन दिए ।
विभिन्न भूमिगत संगठन र समासमायिक राजनीतिक घटनाक्रमका कारण आकस्मिक रुपमा आउन सक्ने सुरक्षा चुनौतीहरूलाई विशेष ध्यान दिदै चुस्त दुरुस्त रुपमा सुरक्षा व्यवस्था मिलाउन निर्देशन दिए ।
