नेपाल प्रहरीमा डिआइजी बढुवाको तयारी
काठमाडौं । नेपाल प्रहरीमा एआईजी बढुवाको सिफारिस गरिएसँगै डीआईजी बढुवाको तयारी थालिएको छ । हाल प्रहरीमा डीआईजीको ८ दरबन्दी रिक्त छ भने विश्वराज पोखरेल एआईजी बढुवाकालागि सिफारिस भएसँगै रिक्त सिट संख्या ९ पुग्नेछ ।
पोखरेललाई गृह सचिव महेश्वर न्यौपानेको अध्यक्षतामा बसेको बढुवा समितिको बैठकले सोमबार एआईजीमा बढुवा गर्न सिफारिस गरिसकेको छ । डीआईजीको ९ दरबन्दीमा तीन ब्याचका प्रहरी वरिष्ठ उपरीक्षक (एसएसपी) बीच प्रतिस्पर्धा सुरु भएको छ ।
सरकारले कात्तिक अन्तिम साता ५ जना डीआईजीको दरबन्दी थप गरेको थियो भने हालका महानिरीक्षक शैलेश थापा क्षेत्रीका ब्याजी हरिबहादुर पाल, निरजबहादुर शाही र प्रद्युम्न कार्कीको एआईजीमा बढुवा भएसँगै तीन सिट खाली थियो ।
डीआईजीका लागि प्रहरी महानिरीक्षक क्षेत्रीकै ब्याचका टोलीसहित ११ चैत २०४९ र ५ चैत २०५१ मा प्रहरी निरीक्षकमा भर्ना भएको टोली प्रतिस्पर्धामा छ । आईजीपी क्षेत्रीका ब्याचका १४ जना एसएसपी डीआईजी बढुवाको प्रतीक्षामा छन् ।
क्षेत्रीका ब्याचका गणेशबहादुर ऐर, पुरुषोत्तम कँडेल, दीलिपकुमार चौधरी, राजेशलाल कर्ण, डा. देवबहादुर बोहरा, रामकृपाल साह, उमेश रञ्जितकार, नरोत्तमलाल प्रधान, प्रकाश अधिकारी, देबबहादुर बोगटी, राजेन्द्रप्रसाद चौधरी, किशोर दाहाल, शेखर कोइराला र प्रदीपकुमार श्रेष्ठ डीआईजी बढुवाका दाबेदार हुन् ।
प्रहरी प्रधान कार्यालयले भने वरिष्ठताको आधारमा बढुवा गर्ने इच्छा राखेको भएपनि महानिरीक्षक क्षेत्रीले जारी गरेको आचारसंहितामा पनि वरिष्ठतालाई जोड दिइएको छ भने सरुवामा पनि कुनै आर्थिक वा नैतिक विषयमा प्रश्न नउठे एक वर्षसम्म नचलाउने भनिएको छ । तर, डीआईजी पोखरेलको एकल बढुवा प्रकरण र काठमाडौंबाट एसएसपी श्याम ज्ञवालीलाई समय नपुग्दै तानिसकिएकाले यसपटक महानिरीक्षक थापाको आचारसंहिताले खासै केही गरेन ।
