इलामको जौवारीमा बीओपी स्थापना
इलाम । इलामको सन्दकपुर गाउँपालिका ५ स्थित जौवारीमा सशस्त्र प्रहरी बलको बोर्डर आउट पोष्ट (बीओपी) स्थापना भएको छ । प्रदेश नम्बर १ का आन्तरिक मामिला तथा कानुन मन्त्री हिक्मत कार्की तथा सोही प्रदेशका कृषिराज्यमन्त्री राम रानाले बीओपीको उद्घाटन गरेका हुन् ।
सशस्त्र प्रहरी बल, नम्बर १ गण इलाम मातहतमा स्थापना भएको बीओपी सीमा सुरक्षा, सीमा क्षेत्रमा हुने चोरीपैठारी निकासी नियन्त्रण, सीमा अपराध नियन्त्रणलगायत विविध कामकारवाहीहरुमा परिचालित हुनेछ । इलामको सदरमुकामदेखि करिब ३९ किलोमिटरको दूरीमा नेपाल भारत सीमानाका भन्दा करिब १ किलोमिटर वर स्थापना गरिएको उक्त बीओपीले आजैबाट दैनिक कार्य सुचारु गरेको छ ।
सशस्त्र प्रहरी बलको एक प्लाटुन टोली आवश्यक बन्दोवस्तीका सामानसहित सो ठाउँमा खटिएको हो । सरकारको नीति अनुरुप सीमानालाई अझ बजबुद बनाउनका लागि तथा सीमा अपराध नियन्त्रण र रोकथाम गर्नका लागि सशस्त्र प्रहरी बल, नेपालको बोर्डर आउट पोष्टहरु थप गर्दै लगिएको हो ।
हालसम्म १८९ वटा बोर्डर आउट पोष्ट स्थापना भइसकेको छ भने पहिलो चरणमा भविष्यमा २२१ वटा बोर्डर आउट पोष्ट स्थापना गर्ने योजनाका साथ आवश्यक कार्य भइरहेको सशस्त्र प्रहरी बलले जनाएको छ ।
