उपत्यकाका सबै प्रहरी कर्मचारीलाई मानवअधिकारबारे प्रशिक्षण दिन सुरु
काठमाडौं । काठमाडौं उपत्यकाका सबै प्रहरी कर्मचारीलाई मानवअधिकारबारे प्रशिक्षण दिन सुरु गरिएको छ । पछिल्ला केही घटनामा प्रहरीले दमन गरेको भन्दै आलोचना भएपछि महानगरीय प्रहरी आयुक्तको कार्यालय रानीपोखरीले काठमाडौं उपत्यकाका २४३ वटै युनिटहरुमा मानवअधिकार सम्बन्धी प्रशिक्षण सुरु गरेको हो ।
प्रशिक्षणका लागि एसएसपी सुशील कुमार यादव र किरण बज्राचार्य नेतृत्वको टोली खटाइएको महानगरीय प्रहरी कार्यालय रानीपोखरीका प्रमुख डीआईजी विश्वराज पोखरेलले जानकारी दिएका छन् । पोखरेलका अनुसार नागरिक अधिकारलाई सम्मान गर्दै व्यवसायिक जिम्मेवारी कसरी पूरा गर्ने भनेर जवानदेखि अधिकृतसम्मलाई प्रशिक्षण दिन सुरु गरिएको छ ।
पहिलो दिनको प्रशिक्षण प्रहरी वृत नयाँबानेश्वरबाट सुरु गरिएको छ । केही दिनअघि कुलमान घिसिङलाई नेपाल विद्युत प्राधिकरणमा पुनः नियुक्तिको माग गर्दै प्रदर्शनमा उत्रिएकाहरुलाई प्रहरीले निर्घात कुटपिट गरेको थियो । कुटपिटपछि प्रहरीको व्यापक आलोचना भइरहेको छ । काठमाडौंका विभिन्न स्थानमा प्रहरीले गरेको दमनको विरोध भएपछि छानविनका लागि एसएसपी किरण बज्राचार्यको नेतृत्वमा समिति गठन गरेको छ ।
