कपिलवस्तुमा कोरोना संक्रमितको स्वास्थ्य लाभको कामना गर्दै फलफुल र स्वास्थ्य किट प्रदान
कपिलवस्तु । कोरोना संक्रमितलाई समुदायमा फरक व्यवहार गरिएका घटना दैनिकजसो सार्वजनिक भएका छन् । तर कपिलवस्तु प्रहरीले भने यस्ता घटना निरुत्साहित बनाउन आईसोलेशनमा रहेका संक्रमितलाई भेटेर स्वास्थ्य लाभको कामना गर्दै फलफुलसँगै स्वास्थ्य किट दिएको छ ।
जिल्ला प्रहरी कार्यालय कपिलवस्तुको समन्वयमा कपिलवस्तु नगरपालिकाको आईशोलेशन र होम आईसोलेशनमा रहेका ३१ संक्रमितलाई फलफुल र स्वास्थ्य किट दिईएको हो ।
कपिलवस्तुतका प्रमुख जिल्ला अधिकारी दिर्घनारायण पौडेल, प्रहरी उपरीक्षक नवराज अधिकारी, सशस्त्र प्रहरी उपरीक्षक धु्रब कार्की, अनुसन्धान प्रमुख जयेन्द्र उपाध्याय सहितको टोली होम आईसोलेशनमा रहेका संक्रमितको घर घरमा पुगेको थियो ।
कोभिड १९ संक्रमित भई आईसोलेशनमा रहेका कपिलवस्तु नगरपालिकाका संक्रमितलाई घरमै पुगी हौसला प्रदान गरिएको र कार्यक्रमलाई अन्य स्थानमा समेत सञ्चालन गर्ने योजना रहेको कपिलवस्तुका प्रहरी उपरीक्षक नवराज अधिकारीले जानकारी दिए ।
वितरण गरिएको स्वास्थ्य किट युएफएड र युनिसेफले सहयोग गरेको थियो भने कपिलवस्तु प्रहरीले सबैलाई फलफुल उपलब्ध गराएको थियो ।
