बागलुङमा एक लाख ९३ हजार मतदाता कायम

बागलुङ । बागलुङमा आगामी फागुन २१ गते हुने प्रतिनिधिसभा निर्वाचनका लागि कूल एक लाख ९३ हजार ३८१ जना मतदाता कायम भएका छन् । जिल्ला निर्वाचन कार्यालय बागलुङका अनुसार ९४ हजार ८०६ पुरुष र ९८ हजार ५७४ महिला मतदाता रहेका छन् ।

असोज १० गतेदेखि मङ्सिर ५ गतेसम्म दर्ता भएको मतदाता नामावलीमा १६ देखि २८ वर्षसम्मका उमेर समूह बढी रहेको जिल्ला निर्वाचन कार्यालय बागलुङका प्रमुख प्रमुख यज्ञप्रसाद रिजालले जानकारी र्दिए । उनका अनुसार जिल्लाभर पाँच हजार २५३ जना नयाँ मतदाता थपिएका छन् ।

मतदाता नामावली दर्ता गराउनेमा सबैभन्दा बढी युवापुस्ता रहेको उहाँको भनाइ छ । जिल्ला बाहिरका १०० मतदाताहरूले बागलुङबाट नामावली दर्ता गराएको प्रमुख रिजालले बताए । जिल्ला निर्वाचन कार्यालयमै पुगेर एक हजार ४६४ जना र राष्ट्रिय परिचय प्रणालीतर्फबाट तीन हजार ९२९ जनाले मतदाता नामावलीमा नाम दर्ता गराएको उनले जानकारी दिए ।

उनले भने, “नामावली दर्ता गराउने धेरैजसो नयाँ युवा पुस्ताहरू छन्, राष्ट्रिय परिचय पत्रमार्फत नामावली दर्ता गराउने ‘सिस्टम’ आएपछि धेरै सजिलो भयो, केही हाम्रो कार्यालयमै आएर आफ्नो नाम दर्ता गराउनुभयो ।”

बागलुङमा दुई वटा निर्वाचन क्षेत्र रहेका छन् । क्षेत्र नं १ मा ४८ मतदानस्थलको ११५ वटा मतदान केन्द्रमा ९८ हजार ८४६ जना र क्षेत्र नं २ मा ५९ मतदानस्थलको ११५ वटा मतदान केन्द्रमा ९५ हजार ३३५ जना मतदाता रहेका छन् ।