पूर्वमन्त्री दाहालको निधनमा कांग्रेसद्वारा शोक प्रस्ताव पारित

काठमाडौँ । नेपाली कांग्रेसले पूर्वकेन्द्रीय सदस्य एवं वरिष्ठ पत्रकार होमनाथ दाहालको निधनमा आइतबार पार्टीका सबै तहका कार्यालय बन्द गर्ने भएको छ ।

शनिबार कार्यवाहक सभापति पूर्णबहादुर खड्काको सभापतित्वमा बसेको केन्द्रीय कार्यसमितिको आकस्मिक बैठकले पुस २६, २७ र २८ गते पार्टीको केन्द्रीय कार्यालय, प्रदेश कार्यालय र जिल्ला कार्यकालहरूमा झण्डा आधा झुकाउने निर्णय गरेको हो ।

पार्टी कार्यालयका मुख्यसचिव कृष्णप्रसाद पौडेलले दाहालको स्वर्गारोहणको १३ दिनसम्म केन्द्र, प्रदेश र जिल्ला कार्यालयहरूमा शोक पुस्तिका राख्ने र स्वर्गारोहणको १३ औँ दिनमा सम्बन्धित जिल्ला ओखलढुङ्गामा शोकसभाको आयोजना गर्ने निर्णय पनि बैठकले गरेको छ ।

बैठकले दाहालको निधनप्रति गहिरो दुःख व्यक्त गर्दै शोक प्रस्तावसमेत पारित गरेको छ । ८४ वर्षीय दाहालको शुक्रबारका काठमाडौंको मैतिदेवीस्थित निवासमा निधन भएको थियो । स्वर्गीय दाहाल नेपाल पत्रकार महासङ्घको पूर्वसभापति, राष्ट्रपुकार साप्ताहिकका सम्पादक एवं प्रकाशक र गोरखापत्र संस्थानका पूर्वअध्यक्ष भएका थिए ।

दाहाल वि.सं. २०५६ को आम निर्वाचनमा ओखलढुङ्गा जिल्ला निर्वाचन क्षेत्र नं. १ बाट प्रतिनिधिसभा सदस्य पदमा निर्वाचित भएर कृषि तथा सहकारी मन्त्रीको जिम्मेवारी पनि सम्हालेका थिए ।