उच्चस्तरीय राजनीतिक संयन्त्रको बैठकमा गएनन् गगन थापा
काठमाडौं । उच्चस्तरीय राजनीतिक संयन्त्रको बैठक बसिरहेको छ । बैठक प्रधानमन्त्री निवास बालुवाटारमा बसिरहेको छ ।
बैठकमा प्रधानमन्त्री केपी शर्मा ओली, एमाले वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, महासचिव शंकर पोखरेल र उपमहासचिव विष्णु रिमाल सहभागी छन् ।
त्यस्तै नेपाली कांग्रेसबाट सभापति शेरबहादुर देउवा, गृहमन्त्री रमेश लेखक र परराष्ट्रमन्त्री डा. आरजु राणा देउवा सहभागी छन् । मंगलबार सत्ता गठबन्धन दलका दुई शीर्ष नेता प्रधानमन्त्री ओली र नेपाली कांग्रेस सभापति देउवाबीच भेटवार्ता भएपछि आजका लागि बैठक बोलाइएको थियो ।
सरकारको कामबारे सत्तारुढ कांग्रेसका महामन्त्रीद्वय गगन थापा र विश्वप्रकाश शर्मा तथा अन्य नेताहरुले सरकारको आलोचना गर्न थालेपछि संयन्त्रको बैठक बोलाइएको हो ।
तर बैठकमा महामन्त्री थापा नै सहभागी भएका छैनन् । सरकार सञ्चालन गर्न सहजीकरण गर्न भन्दै कांग्रेस र एमालेले उच्चस्तरीय राजनीतिक संयन्त्र बनाएका थिए ।
