पार्टीभित्र विचारको कुनै मतभेद नभएको अध्यक्ष नेपालको दाबी
काठमाडौ । नेकपा एकीकृत समाजवादीका अध्यक्ष माधवकुमार नेपालले पार्टीभित्र विचारको कुनै मतभेद नरहेको बताएका छन् ।
सोमबार काठमाडौंमा अखिल नेपाल महिला संघ (समाजवादी) को मुखपत्र सार्वजनिक गर्दै अध्यक्ष नेपालले पार्टीको १० औं महाधिवेशन नजिकै आइरहेको अवस्थामा पार्टीभित्र विचारको कुनै मतभेद नरहेको बताएका हुन् ।
समाजवादलाई अघि बढाउने उद्देश्यका साथ पार्टी गठन भएको भन्दै अध्यक्ष नेपालले समाजवादउन्मुख मुलुक निर्माणका लागि पार्टीले पाइला चालिरहेको बताए उनले महाविधेशनमार्फत नेपाली विशेषताको समाजवादको धारणालाई व्यवस्थित गर्ने उल्लेख गरे ।
अध्यक्ष नेपालले अहिलेको व्यवस्था र संविधान अनुसारको संरचनाबाट केही बिकृतिहरु पैदा भएकाले त्यसलाई सुधार गर्दै अघि बढ्नुपर्ने बताए ।
उनले आफूहरुसँंग बिचार मिल्ने र सहकार्य गर्न चाहनेहरुलाई साथ लिएर अघि बढ्न चाहेको र त्यसका लागि सक्दो पहलकदमी लिदै आएको जिकिर गरे ।
त्यस्तै नेकपा एकीकृत समाजवादीका सम्मानीत नेता झलनाथ खनालले नेपालको कम्युनिष्ट आन्दोलनले समाजवादलाई अघि बढाउन नसकेकाले आफ्नो पार्टीले समाजवादी कार्यक्रमलाई अघि बढाउने बताए ।
उनले महाधिवेशनमा पार्टीको बिभिन्न दस्तावेजहरुलाई परिस्कृत गर्दै पारित गर्ने दावी गरे । उनले सहमतिका साथ नेतृत्व निर्माण गर्नुपर्ने बताए । उनले श्रमजिवी महिलाहरुसंग पार्टी पुर्याउन नसके कुनै पनि क्रान्ति सम्भव नरहेको बताए ।
