विदेशी पर्यटक नेपाल ल्याउन रेल र सुरुङमार्ग आवश्यकः अध्यक्ष ओली
नुवाकोट । नेकपा एमालेका अध्यक्ष केपी शर्मा ओलीले देशलाई कंगाल बनाएर ढुकुटी भर्ने कमिसनको खेल बन्द गर्न गठबन्धन सरकारलाई आग्रह गरेका छन् ।
पार्टीले सञ्चालन गरेको झुलाघाट चिवाभन्जाङ्ग स्थलगत यात्राका क्रममा आइतबार नुवाकोट पुगेका अध्यक्ष ओलीले एनसेलको सेयर खरिदबिक्री प्रकरणमा ठूलो आर्थिक अपराध भइरहेको बताए ।
उनले आर्थिक अपराधको खेल नेकपा एमाले र नेपाली जनतालाई मान्य नहुने बताए । आगामी सन् २०२७ मा नेपाल सरकारलाई हस्तान्तरण गर्नुपर्ने कम्पनीले कर छल्न कम्पनी अर्कालाई बेचेको नाटक गरिएको अध्यक्ष ओलीले बताए ।
अध्यक्ष ओलीले विदेशी पर्यटक नेपाल ल्याउन रेल र सुरुङमार्ग आवश्यक रहेको बताए । उनले नेपाल र नेपालीको हितमाभन्दा अहिलेको सरकार आफ्नै हितमा केन्द्रित रहेको आरोप लगाए ।
उनले मध्यपहाडी लोकमार्ग स्तरोन्नति गर्ने विषयमा एमालेको गम्भीर ध्यान गएको बताए । हरेक क्षेत्रको विकास र विस्तार तीव्र गतिमा हुनुपर्नेमा अहिलेको सरकार कानमा तेल हालेर बसेको ओलीको आरोप थियो ।
