चुनावअघि गठबन्धन गर्नु हुँदैनः कोइराला
काठमाडौं । नेपाली काङ्ग्रेसका नेता डा.शेखर कोइरालाले पछिल्लो समय जनस्तरमा देखिएको आक्रोस व्यवस्थाप्रति नभएको बताएका छन् । शुक्रबार रीता शाहीद्वारा लिखित ‘चिनारी’ नामक दोस्रो गजल संग्रह विमोचन कार्यक्रममा कोइरालाले राजनीतिक दलका नेताहरुको गतिविधिका कारण आक्रोस पैदा भएको बताए ।
उनले भने, ‘युवाहरु निरास भएको अवस्था छ । देशमा देखिएको आक्रोस व्यवस्था प्रति होइन, हाम्रै क्रियाकलापका कारण जन्मिएको हो । जुन गलत कामहरु भइरहेका छन्, त्यसप्रतिको आक्रोस हो । यसलाई नेपाली काङ्ग्रेस मात्रै होइन, सबै राजनीतिक दलले समयमै बुझेर नियन्त्रण गर्न सके व्यवस्थालाई कुनै असर गर्दैन ।’त्यसका आफ्नो व्यवहार, आचरणलाई परिवर्तन गर्न आवश्यक रहेको उनले बताए ।
कोइरालाले कम्युनिस्ट पार्टीसँग गठबन्धनलाई निरन्तरता दिए कांग्रेस पार्टी विस्तारै सकिने बताए । कोइरालाले अहिलेको व्यवस्थामा गठबन्धन आवश्यक भएपनि चुनावपछि मात्रै गठबन्धन गर्नुपर्नेमा जोड दिए ।
देश परिवर्तन गर्नु छ भने, नेपाली काङ्ग्रेसलाई परिवर्तन गर्दै जानुपर्नेमा जोड दिंदै कोइरालाले भने, ‘यसो गर्न सक्यो भने मात्रै देश परिवर्तन हुन्छ ।’