कम्युनिष्ट पार्टीको बर्को ओढेर काँग्रेस जिताउन आउनेलाई जनताले विश्वास नगर्ने ज्ञवालीको दाबी
नेपालगञ्ज । नेकपा एमालेका उपाध्यक्ष युवराज ज्ञवालीले आगामी निर्वाचनमा एमालेले बहुमत ल्याउने दाबी गरेका छन् । नेकपा एमाले बाँके जिल्ला कमिटीको आयोजनामा खजुरामा आयोजित कार्यकर्ता प्रशिक्षणमा उपाध्यक्ष ज्ञवालीले एमाले निर्वाचनमा पराजित हुँदा राष्ट्रवाद र समाजवाद नै पराजित हुने बताएका हुन् ।
उनले भने, ‘कम्युनिष्ट पार्टीको बर्को ओढेर काँग्रेस जिताउन आउनेहरूलाई जनताले विश्वास गर्ने छैनन् ।’ उनले काँग्रेसलाई नेता मान्नेहरू कम्युनिष्ट हुनै नसक्ने बताए । संसदको पुनस्र्थापना र १० बुँदे सहमतिपछि पनि पार्टी विभाजन हुनु गलत भएको उनको भनाई थियो ।
कार्यक्रममा पार्टीका सचिव तथा लुम्विनी प्रदेश कमिटीका इन्चार्ज छबिलाल विश्वकर्माले कार्यकर्ताको शक्तिको बलमा नेकपा एमाले अहिलेसम्म टिक्न सकेको भन्दै एमाले र यसको नेतृत्वप्रति जन विश्वास कायम रहेको बताए ।
कार्यक्रममा २०७४ सालमा बाँके प्रदेशसभा २(क) बाट तत्कालीन सङ्घीय समाजवादी पार्टीबाट विजयी सांसद विजय वहादुर यादव एमालेमा प्रवेश गरेका छन् ।
