नेविसंघको रिले अनसनमा माधव नेपालको समर्थन
काठमाडौं । नेपाल विद्यार्थी संघले त्रिभुवन विश्वविद्यालयको उपकुलपतिको कार्यालयमा गरिरहेको रिले अनसनमा नेकपाको प्रचण्ड–नेपाल समूहका अध्यक्ष माधवकुमार नेपालले ऐक्यवद्धता जनाएका छन् ।
नेविसंघ त्रिवि समिति सचिव योगेन्द्र रावलका अनुसार बिहीबार दिउँसो अध्यक्ष नेपालले अनसनस्थल आएर मागहरूप्रति समर्थन जनाएका हुन् । स्वतन्त्र विद्यार्थी युनियनको निर्वाचन तत्काल घोषणा गर्नुपर्ने, कोभिड–१९ को कारणले लामो समयपछि भएको परीक्षा र त्रिविको नजिता प्रकाशनमा हुने ढिलासुस्तीले विद्यार्थीहरुको शैक्षिक सत्र गुम्ने अवस्था भएकोले परीक्षा भएको एक महिनाभित्र नतिजा प्रकाशनको सुनिश्चितता गर्नुपर्नेलगायत माग नेविसंघको छ ।
त्रिविको क्यालेन्डर अनुसारको नयाँ भर्ना प्रक्रिया सुचारु गर्न पनि उनीहरूले माग राखेका छन्। यस्तै नेविसंघ त्रिवि समिति र त्रिविबीच भएको २३ बुँदे सहमति कार्यान्वयन गर्नसमेत उनीहरूले माग गर्दै आएका छन् ।
