जनतालाई विश्वासमा लिएर काम गरेमा राप्रपा सदैव साथ दिन तयार छः डा. लोहनी
काठमाडौं । राष्ट्रिय प्रजातन्त्र पार्टीका अध्यक्ष डा. प्रकाशचन्द्र लोहनीले लिपुलेकको बारेमा भारत र चीनसँग वार्ता गर्न सरकारलाई सुझाव दिएका छन् । प्रधानमन्त्रीको आह्वानमा बुधबार आयोजित सर्वदलीय बैठकमा अध्यक्ष लोहनीले लिपुलेकको विषयमा चीन र भारतसँग कुरा गर्न र त्यो व्यापार मार्गको फाइदा नेपालले पनि पाउनुपर्र्ने बताए ।
लोहनीले भने, ‘तपाईंहरुले लिपुलेक र लिम्पियाधुराको बारेमा नेपालको राष्ट्रिय स्वार्थलाई हेलचेक्रायाई गर्नुभएको हो । यसलाई नेपाली जनताले स्वीकार गर्दैनन् अब वार्तामा जानुहोस् । सो क्षेत्र हाम्रो हो भन्ने पर्याप्त प्रमाण छन्’, ‘त्यसको आधारमा वार्ता गर्नुहास् यथार्थ कुरा के हुन्छ नेपालको संसद र संसदीय समितिहरुलाई स्पष्ट जानकारी दिई नेपाली जनताको विश्वास लिनुहोस् । राष्ट्रिय स्वार्थको विषयमा राजनीति नगर्नुहोस् । नेपाली जनतालाई विश्वासमा लिएर काम गर्नु भएमा राष्ट्रिय प्रजातन्त्र पार्टी सदैव साथ दिन तयार छ । लिपुलेकको विषयमा पनि चीन र भारतसँग कुरा गर्नु पर्यो त्यो व्यापार मार्गको फाइदा नेपालले पनि पाउनुपर्छ भनि त्रिपक्षीय वार्ता हुनुपर्दछ । आफ्नो स्वामित्वमा रहेको भूमिको सन्र्दभमा वार्ता गर्न सरकारलाई सबै नेपाली जनताको साथ र सहयोग रहन्छ ।’
