कोरोनाको कहरपछि अर्थतन्त्रमा पर्ने प्रभावबारे कांग्रेसद्वारा अर्थविदहरुसँग छलफल
काठमाडौं । नेपाली कांग्रेसले मंगलबार अर्थविद् र पार्टीका पूर्वअर्थमन्त्रीहरूसँग छलफल गरेको छ । कांग्रेसले कोरोना भाइरस नियन्त्रणपछि नेपाली अर्थतन्त्रमा पर्न सक्ने असरकाबारेमा पार्टी पदाधिकारी, अर्थविद् र पार्टीका पूर्वअर्थमन्त्रीहरूसँग छलफल गरेको हो ।
कोरोना भाइरसले नेपालको पर्यटन, कृषि र औद्योगिक क्षेत्रको उत्पादनमा आउने कमीले पर्ने असरका विषयमा छलफल भएको प्रवक्ता विश्वप्रकाश शर्माले जानकारी दिए । कोरोनाको विश्वव्यापी असरका कारण विदेशमा रहेका नेपालीहरूको रोजगारी गुम्न सक्ने खतरा र त्यसले नेपाली रेमिट्यान्समा पार्ने प्रभावका विषयमा पनि छलफल भएको उनले बताए । कांग्रेसले कोरोना महामारीको विषम् परिस्थितिमा विभिन्न क्षेत्रका विज्ञहरूसँग छलफल गरिरहेको छ । पार्टीका पूर्वस्वास्थ्यमन्त्री र चिकित्सकहरूसँग छलफल गरेको थियो ।
