मुख्यमन्त्री राउतले भने -हल्लाको पछाडी नलाग्नुस्, यो सरकार पाँच वर्षसम्म चल्छ
जनकपुरधाम । प्रदेश दुईका मुख्यमन्त्री लालबाबु राउतले मधेश आन्दोलनको म्यान्डेट अनुरुप गठन भएको समाजवादी र राजपा गठबन्धनको सरकार ५ वर्षसम्म चल्ने दावी गरेका छन् ।
नेपाल इन्जिनियर्स एशोसिएशन प्रदेश दुईको प्रथम वार्षिकोत्सव कार्यक्रममा मुख्यमन्त्री राउतले भने, ‘ हल्लाको पछाडी नलाग्नुस्, यो सरकार मधेश जनताको म्यान्डेटले बनेको हो, पाँच वर्षसम्म चल्छ , न सरकार फेरिन्छ, न मन्त्री ।’
संघीयतालाई नरुचाउने प्रतिक्रियावादी शक्तिहरु समाजवादी र राजपाबीच फुट डालेर संघीयतालाई नै सखाप पार्ने षडयन्त्र गरिरहेको उल्लेख गर्दै मुख्यमन्त्री राउतले दुबै दलका शीर्ष नेताहरुले चयन गरेका मन्त्री फेर्ने काम नहुने स्पष्ट पारे ।
यो सरकार सिक्ने क्रममा रहेको र कर्मचारीतन्त्रबाट पूर्ण सहयोग पाउन नसकेको अवस्थामा केही समस्याहरु आएको उनले स्वीकार गरे । उनले मुलुकको संघीयता जोगाउने अभिभारा प्रदेश नं. २ माथिनै रहेकाले आफूहरु झिना मसिना कुरामा नअल्झिने समेत स्पष्ट पारे ।
एक अर्को प्रसंगमा मुख्यमन्त्री राउतले गत आर्थिक वर्षको भुक्तानी गर्न कानून समस्याहरु आएकोले ढिलो हुन गएपनि अबको केही दिनमै नियमावली बनाएर भुक्तानी दिने तयारी शुरु भैसकेको बताए ।
