उपसभामुखले राजीनामा नदिनु लोकतान्त्रिक मान्यता विपरितः प्रवक्ता श्रेष्ठ
लमजुङ । सत्तारुढ नेपाल कम्युनिस्ट पार्टीका प्रवक्ता नारायणकाजी श्रेष्ठले उपसभामुख शिवमाया तुम्बाहाङ्फे नै सभामुख पदको सशक्त उम्मेदवार भएको बताएका छन् । प्रेस संगठन लमजुङले गरेको अन्तरक्रियामा प्रवक्ता श्रेष्ठले प्रतिनिधिसभाको उपसभामुख बनिसकेकाले शिवमाया पार्टीको तर्फबाट सभामुखको सशक्त उम्मेदवार भएको बताएका हुन् ।
संवैधानिक प्रावधान अनुसार उपसभामुखले राजीनामा नदिएसम्म संसद्को सबैभन्दा ठूलो दल नेकपाले समाभुख पद नै गुमाउने स्थिति सिर्जना भएकाले उहाँलाई राजीनामा दिन पार्टीले आग्रह गरेको उनले बताए ।
श्रेष्ठले उपसभामुखले संसदको ठूलो दल नेकपाले नै सभामुख गुमाउने अवस्था सिर्जना हुँदासम्म राजीनामा नदिनु लोकतान्त्रिक मान्यता विपरित भएको बताए । ‘सभामुख संसद्को सबैभन्दा ठूलो दल हाम्रो पार्टीले नपाउने स्थिति सिर्जना गर्नु पार्टीको हित चाहने र लोकतान्त्रिक मान्यता स्वीकार गर्ने पक्षका निम्ति हितकर कुरा होइन’, उनले भने।
