कास्कीमा निर्वाचनमा सरकारले धाँधली गरेको देउवाको आरोप
काठमाडौं । नेपाली कांग्रेसका सभापति शेरबहादुर देउवाले कास्की क्षेत्र नम्बर दुईको निर्वाचनमा सरकारले स्थानीय प्रशासन लगाएर धाँधली गरेको लगाएका छन् । सोमबार पार्टी कार्यालय सानेपामा कांग्रेस नेता स्वर्गीय भीमबहादुर तामाङको ७ औं स्मृति सभामा सभापति देउवाले सरकारले धाँधली गरेको आरोप लगाएका हुन् ।
उनले कास्कीमा निर्वाचनमा स्थानीय प्रशासनले निष्पक्ष काम नगरेको आरोप लगाउदै निर्वाचनमा प्रशासनलाई सरकारले कांग्रेस बिरुद्ध प्रयोग गरेको दाबी गरे । कांग्रेसको मत भएको क्षेत्रमा बम पड्काउन लगाएर जनतालाई त्रासमा राखेर निर्वाचनमा धाँधली गरेको सभापति भनाई थियो ।
बरिष्ठ नेता रामचन्द्र पौडेलले जनता सरकारप्रति असन्तुष्ट रहेपनि कांग्रेसलाई रोज्न नसकेको भन्दै समीक्षा हुनुपर्ने बताए । निर्वाचनको नतिजाले जनता सरकार सँग असन्तुष्ट भए पनि कांग्रेस भरोसा गर्न योग्य भएन भन्ने संकेत भने देखिएको बताए । कांग्रेसले इतिहास जपेर मात्र नहुने भन्दै जनतालाई भविष्यमा कस्तो नेपाल दिने भनेर सोच्ने बेला आएको बताए ।
