राप्रपा र राप्रपा लोकतान्त्रिकबीच चुनावी टक्कर
पाँचथर । कमल थापको नेतृत्वमा रहेको राप्रपा र लाक्पा तामाङको नेतृत्वमा रहेको राप्रपा लोकतान्त्रिकबीच उपनिर्वाचनको क्रममा टक्कर चलेको छ ।
फिदिम नगरपालिका वडा नं १ अध्यक्ष पदका लागि राप्रपा लोकतान्त्रिकले दिएको उम्मेद्वारी विरुद्ध राप्रपाले उजुरी नै दिएको थियो ।
राप्रपा लोकतान्त्रिकको उम्मेद्वारी किर्ते भएको भन्दै राप्रपाले दर्ता गरेको उजुरी निर्वाचन आयोगले बदर गरिदिएको थियो । जसकारण राप्रपा लोकतान्त्रिक चुनाव चिन्ह साँढे गोरु लिएर चुनावमा होमिएको छ भने राप्रपा नेपालको चिन्ह गाई छ ।
निर्वाचन आयोगले आवश्यक छानविनपछि राप्रपा लोकतान्त्रिकको उम्मेद्वारीलाई कायम गरेको हो ।
बुद्ध राष्ट्रको वकालत गर्ने राप्रपा लोकतान्त्रिकका तर्फबाट वडा अध्यक्षमा जानुका थाम्सुहाङ सशक्त उम्मेद्वारको रुपमा खडा छन् ।
उस्ताउस्तै देखिने चुनाव चिन्हका कारण राप्रपा लोकतान्त्रिकले आफ्नो भोट काट्ने भन्ने राप्रपा नेपालको दावी छ । अर्कोतर्फ राप्रपा नेपालले आफ्नो भोट लाने भन्दै राप्रपा लोकतान्त्रिकले चिन्ता प्रकट गरेको छ ।