रवीन्द्र मिश्र भन्छन् -साझा पार्टी राजनीतिक एजेण्डामा मुलुकको पहिलो पार्टी
सिरहा । साझा पार्टीका संयोजक रवीन्द्र मिश्रले जनताको मुल एजेण्डा सार्वजनिक रुपमा उठाउन सक्ने हिसावले साझा पार्टी मुलुकको पहिलो राजनीतिक शक्ति भएको वताएका छन् ।
साझा पार्टी सिरहाको संयोजक घोषणा तथा नागरिक सम्बोधन कार्यक्रमलाई गोलबजारमा सम्बोधन गर्दै संयोजक मिश्रले प्राविधिक रुपमा पाँचौ स्थानमा भएपनि राजनीतिक रुपमा पहिलो पार्टी भएको दावी गरेका हुन् ।
विना संगठन पार्टी निर्माणकै अवस्थामा पुराना पार्टीलाई पछि पार्दै हाम्रो पार्टी पाँचौ स्थानमा आउनु जनताको ठूलो साथ हो मिश्रको भनाई छ ।
मधेश काठमाडौ र प्रदेश सरकार दुवैवाट पीडित भएको भन्दै शिक्षामा सवैभन्दा ठुलो लगानी नगरेसम्म मधेशको विकास असम्भव हुने मिश्रको भनाई छ ।
फरक प्रसंगमा संयोजक मिश्रले संविधानलाई नाघेर हिंसात्मक गतिविधिमा लागेको विप्लव माओवादीलाई सरकारले प्रतिवन्ध लगाउनु स्वभाविक भएको बताए । उनले हिसांत्मक गतिविधि र बम विष्फोट गराउनु शान्ति विरोधी गतिविधि भएको उनले बताए ।
भेलाले सिरहा जिल्ला संयोजकमा स्थानी पार्टी अगुवा धनपति महतोलाई चयन गरेको छ । समारोहमा पार्टीका केन्द्रीय सदस्य मुमाराम खनाल,प्रकाशचन्द्र परियार,अब्दुश मियाँ लगायतको सहभागिता थियो । प्रदेश नं २ मा सिरहा पार्टीको पहिलो औपचारिक जिल्ला संगठन हो ।
