भोटेकोसी बाढी प्रभावितका लागि राहत र पुनःस्थापनाको प्याकेज ल्याउन सांसद मल्लको माग

काठमाडौं । नेपाली कम्युनिष्ट पार्टी(नेकपा)का सांसद रमेश कुमार मल्लले सल्यानमा भएका श्रृङ्खलाबद्ध दुर्घटनाबारे सरकारको ध्यानाकर्षण गराएका छन्।

मंगलबारको प्रतिनिधिसभा बैठकमा उनले रसुवा बाढीपछि पीडित परिवारले भोगिरहेका समस्या समाधान गर्न तथा खोज, उद्धार, राहत र पुनस्र्थापनाको कामलाई प्रभावकारी बनाउन सरकारसँग माग गरेका हुन्।

मल्लले गत शनिबार त्रिवेणी–५ सिम्कमा भएको जिप दुर्घटनामा आठ वर्षीया रेशम बुढाथोकी, १८ वर्षीया विपना बुढाथोकी र ५० वर्षीय डिल्लीबहादुर वलीको मृत्यु भएको बताए। सोही दिन त्रिवेणी–३ पातरकोटमा तीज मनाउन दाङबाट सल्यान माइती आउँदै गरेकी सीता केसीको मोटरसाइकलको चेनमा सल बेरिएर मृत्यु भएको उनले बताए।

उनले मृतकप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरे। साथै घाइतेको उपचार, दुर्घटनाको छानबिन, यात्रु बिमा, परिवारलाई राहत तथा श्रमिकको सामाजिक सुरक्षा प्रभावकारी रूपमा कार्यान्वयन गर्न सरकारको ध्यानाकर्षण गराए।

मल्लले चाडपर्वअघि राजमार्गदेखि स्थानीय सडकसम्म जोखिम पहिचान गरी तत्काल मर्मत तथा स्तरोन्नति गर्नुपर्ने बताए। सडक पूर्वाधार सुधार, चालकको नियमित स्वास्थ्य परीक्षण, सवारी साधनको अनिवार्य प्राविधिक जाँच र सडक सुरक्षासम्बन्धी जनचेतना बढाउनुपर्ने उनको भनाइ छ।

उनले रसुवा बाढीपछि पीडित परिवारका विभिन्न संवेदनशील प्रश्नको जवाफ दिन पनि सरकारसँग माग गरे। जलविद्युत आयोजनाका सुरुङमध्ये कतिवटामा खोज तथा उद्धार सम्पन्न भयो र कतिवटामा काम जारी छ भन्नेबारे सरकारले स्पष्ट जानकारी दिनुपर्ने उनले बताए।

त्रिशूली, माथिल्लो त्रिशूली–१, २ र १६ लगायतका आयोजनामा खोजी कार्यको पछिल्लो अवस्था सार्वजनिक गर्न माग गर्दै उनले बेपत्ता आफन्तको डीएनए परीक्षण कहिलेसम्म सकिन्छ र परिवारले आधिकारिक पहिचानको जानकारी कहिले पाउँछन् भन्ने विषयमा सरकारसँग जवाफ मागे।

मृतक तथा बेपत्ता नागरिकका परिवारका लागि राहत तथा पुनस्र्थापनाको प्याकेज तत्काल घोषणा गर्नुपर्ने उनले बताए। साथै होल्डिङ सेन्टरमा रहेका बालबालिकाको पठनपाठन सुरु गर्न, बालबालिका केन्द्रित मनोपरामर्श तथा किशोरी सुरक्षाका कार्यक्रम सञ्चालन गर्न र प्रभावित क्षेत्रमा एसईई दिने विद्यार्थीका लागि विशेष प्याकेजसहित कक्षा सञ्चालन गर्न माग गरे।