खुश्बु ओलीको प्रश्नः सदनको गतिरोध अन्त्यका लागि पाँच दिनसम्म किन भएन संवादको आह्वान ?

काठमाडौँ । राष्ट्रिय प्रजातन्त्र पार्टीकी प्रमुख सचेतक खुश्बु ओलीले सदन लामो समयसम्म स्थगित गर्नुको औचित्य पुष्टि गर्नुपर्ने बताएकी छन् । सदन स्थगित गरेर बीचको समयमा गतिरोध अन्त्यका लागि कुनै संवाद नभएको बताएकी हुन् ।

उनले भनेकी छन्, ‘यदि सदनको गतिरोध अन्त्य गर्न संवादको वातावरण बनाउने, राजनीतिक सहमति खोज्ने र सदनलाई प्रभावकारी रूपमा सञ्चालन गर्ने उद्देश्य नै थिएन भने संसदीय अधिवेशन यति लामो समयसम्म स्थगित गर्नुको वास्तविक औचित्य के थियो? सदन स्थगित भएको आज पाँच दिन भइसक्यो । भोलि सदन खुल्दैछ, तर बिना कुनै उपलब्धि भोलि त्यही गतिरोधकै बिन्दुबाट सदन सञ्चालन हुने स्थिति छ। आखिर सदन कसका लागि र कुन प्रयोजनका लागि स्थगित गरियो ?’

उनले विगत पाँच दिनसम्म संवादको लागि कुनै आह्वान भएको र समाधान खोज्ने कुनै पहल नभएको भन्दै असन्तुष्टि पोखिन् ।

उनले भनेकी छन्, ‘प्रतिनिधिसभा नियमावली पारित गर्ने प्रक्रियामा प्रतिपक्षी दलका आवाज मात्र होइन, सत्तारूढ दलकै कयौँ सांसदहरूले दर्ता गरेका संशोधन प्रस्तावहरूलाई समेत बेवास्ता गरिएको भन्दै सदन अवरुद्ध भयो । त्यसपछि प्रधानमन्त्रीको विवादास्पद अभिव्यक्तिले थप गम्भीर प्रश्नहरू जन्मायो । यी विषयमा प्रतिपक्षले राष्ट्रिय हित, संसदीय सार्वभौमिकता र जनप्रतिनिधिहरूको उत्तरदायित्व सुनिश्चित गर्न निरन्तर संवाद र जवाफदेहिताको माग गर्दै आए, र सदन अवरुद्ध भयो । विगत पाँच दिनसम्म संवादको लागि कुनै आह्वान भएन। समाधान खोज्ने कुनै पहल भएन। बरु सदनको लामो स्थगनले राष्ट्रिय मुद्दाभन्दा दलगत आवश्यकतालाई प्राथमिकता दिइएको गम्भीर आशंका पैदा भएको छ। यसबीचमा राष्ट्रिय स्वतन्त्र पार्टीको वडा अधिवेशनका लागि सहजीकरण गरिएको छ। नेपालको सार्वभौम संसद कुनै दल वा व्यक्तिको सुविधाका लागि होइन, जनताको सार्वभौम इच्छाको प्रतिनिधित्व गर्ने सर्वोच्च लोकतान्त्रिक संस्था हो। लोकतान्त्रिक मूल्य र संसदीय मर्यादाको रक्षा गर्न यस्ता विषयमा संघीय संसद् सचिवालयको गम्भीर ध्यान जान आवश्यक छ।’

नेपालले पनि भारतको भूमि मिचेको छ भन्ने प्रधानमन्त्री बालेन साहको अभिव्यक्तिपछि विपक्षी दलहरुले सदन चल्न दिएका छैनन् । उनीहरुले यस विषयमा प्रधानमन्त्रीले सदनमा आएर माफी माग्नुपर्ने अडान राखेका छन् । त्यसपछि सभामुखले आजसम्मका लागि सदन स्थगित गरेका थिए ।