सरकारको नभई ८४ को निर्वाचनको चिन्ता गर्न नेता कार्यकर्तालाई ओलीको आग्रह
काठमाडौं । प्रधानमन्त्री केपी शर्मा ओलीले नेता कार्यकर्तालाई सरकारका बारेमा चिन्ता नगर्न आग्रह गरेका छन् ।
लोकतन्त्र दिवसको अवसरमा काठमाडौंको भृकुटीमण्डपमा आयोजित ‘युथ सेलिब्रेसन’लाई सम्बोधन गर्दै प्रधानमन्त्री ओलीले सरकारको नभई ०८४ को निर्वाचनको चिन्ता गर्न आग्रह गरेका हुन् ।
यो सरकार स्थिरताका लागि बनेको भन्दै प्रधानमन्त्रीले सरकारका बारेमा धेरै चिन्ता नगर्न आग्रह गरे । उनले भने, ‘एमालेले सरकार हेर्ने होइन, ढुक्कले मिसन ८४ मा लाग्नुस् ।’
उनले राष्ट्रवादी अडानका कारण एमालेमाथि विभिन्न पक्ष खनिएको दाबी गरे । प्रधानमन्त्रीले जनताको बलिदानीपूर्ण सङ्घर्षबाट प्राप्त लोकतान्त्रिक गणतन्त्रात्मक उपलब्धिको रक्षा गर्दै युवा अघि बढ्नुपर्ने र युवाले देश बनाउने सङ्कल्प गरी त्यसलाई साकार पार्नुपर्ने बताए ।
उनले भने, ‘देशमा अराजकता मच्चाउने र विभाजन गर्ने तत्वसँग सचेत हुनुपर्छ । ढुक्क हुनुुस्, यसको नेतृत्व एमालेले बाटो नबिराइ गर्नेछ ।’
