निजामती विधेयकमा माओवादीको तीनबुँदे असहमति, ‘कुलिङ पिरियड’ हटाउन रघुजी पन्तको जोड
काठमाडौं । नेकपा एमालेका सांसद रघुजी पन्त निजामती कर्मचारीलाई ’कुलिङ पिरियड’ राख्नुपर्ने पार्टीको प्रस्तावविरुद्ध उभिएका छन् ।
बुधरबार संसदको राज्य व्यवस्था तथा सुशासन समितिको बैठकमा सांसद पन्तले अवकासपछिको नियुक्तिमा ‘कुलिङ पिरियड’ नै राख्न नुहने बताएका हुन् ।
कांग्रेसले दुई वर्ष र एमालेले एकवर्ष ‘कुलिङ पिरियड’ राख्नुपर्ने प्रस्ताव गरेकोमा पन्तले भने राख्नै नहुने बताएका छन् ।
पन्तले भने, ‘ नरहे बाँस, नबजे बाँसुरी भने जस्तो यसमा अल्झेर बस्नु हुँदैन । कुलिङ पिरियड नै नराखौं ।’
सांसद पन्तले यो विषयमा अल्पमत र बहुमतको आधारमा निर्णय लिन नहुने बताएका छन् ।
बैठकमा नेकपा माओवादी केन्द्रले निजामती विधेयकमा तीनबुँदे असहमति राखेको छ । बैठकमा माओवादी केन्द्रका प्रमुख सचेतक हितराज पाण्डेले निजामती विधेयकमा तीनबुँदे अहसमति राखेका हुन् ।
प्रमुख सचेतक पाण्डले कुलिङ पिरियड कम्तिमा दुई वर्ष राख्नुपर्ने, अतिरिक्त सचिव राख्न नहुने र भेटेनरीमा आठौँ तह राख्नुपर्ने फरक मत राखेका छन् ।
