२५ करोड बरामद प्रकरणः राजस्व अनुसन्धान विभागद्वारा दुईजनाविरुद्ध मुद्दा दायर
काठमाडौं । काठमाडौंको टोखाबाट गत चैत ४ गते बरामद भएको २५ करोड रुपैयाँ प्रकरणमा राजस्व अनुसन्धान विभागले दुईजनाविरुद्ध काठमाडौं जिल्ला अदालतमा मुद्दा दायर गरेको छ ।
विभागले ट्रक चालक कुसाङ लामा र फरार नारायण पौडेलविरुद्ध विदेशी विनिमय (नियमित गर्ने) ऐन, २०१९ अनुसार विदेशी मुद्रा अपचलन सम्बन्धी कसूरमा मंगलबार मुद्दा दायर गरेको हो ।
कुसाङ रकम बरामद भएको ट्रकका चालक हुन् भने पौडेल उक्त रकमका मालिक भएको बताइएको छ । पौडेल भने फरार नै छन् । चैत ४ गते टोखा–झोर सडकखण्डमा ना.७ ख १६५२ नम्बरको कन्टेनर (ट्रक) रोकेर खानतलासी गर्दा ट्रकको क्याबिनमा फल्स बटम बनाई लुकाइएको अवस्थामा युरो १३ लाख ७५ हजार १ सय ५० (५००, २००, १०० र ५० दरका नोट) र अमेरिकी डलर ३ लाख २० हजार ८ सय ५० (१०० र ५० दरका नोट) बरामद भएको थियो ।
विभागले आरोपी कुसाङ लामाले पाँच वर्षअघि सुन चोरी पैठारी प्रकरणमा सजाय भुक्तान गरिसकेकाले उनले पुनः त्यही प्रकृतिको कसुर गरेको ठहर गर्दै मुलुकी अपराध संहिता, २०७४ को दफा ४४(२) अनुसार थप सजाय माग गरेको छ ।
त्यस्तै विभागले विदेशी विनिमय ऐनको दफा १७ अनुसार बरामद सम्पूर्ण विदेशी मुद्रा जफत गर्न र घटनामा प्रयोग भएको कन्टेनर ट्रक पनि जफत गर्न मागदाबी गरेको छ । फरार पौडेलको हकमा भने अदालतमार्फत कानूनबमोजिमको म्याद जारी गर्न माग गरिएको छ।
