गगनको प्रश्नः निर्मल निवासमा बसेर उत्पात मच्याउने पूर्वराजा नारायणहिटी दरबारमा बसे भने के होला ?
काठमाडौं । नेपाली कांग्रेस महामन्त्री गगन थापाले नेपालको राजालाई कुनै हालतमा संवैधानिक बनाउन नसकिने बताएका छन् ।
कांग्रेस बागमती प्रदेशले बिहीबार आयोजना गरेको कार्यक्रममा महामन्त्री थापाले पूर्वराजा ज्ञानेन्द्र शाहलाई जति धोइपखाली गरेपनि संवैधानिक बनाउन नसकिने बताएका हुन् ।
उनले भने,‘कांग्रेसले जति राजालाई अरु कसले बाकेको छ ? पार्टीको स्थापना भएदेखि नेपालको राजसंस्थालाई संवैधानिक बनाउनुपर्छ भन्ने मान्यता राख्ने पार्टी हो । आठ वर्ष झ्यालखानामा कोचिएको बिपी कोइरालाले सातवटा ज्यान मुद्दा लिएर नेपाल फर्किदै गर्दा गणेशमान र बिपी कोइराला उभिएर त्यो बेलामा नेपालको राजसंस्थालाई संवैधानिक बनाउनुपर्छ भन्ने मान्यता राखेको पार्टी हो । ०४६ सालको परिवर्तनपछि पनि त्यही मान्यता राखेको पार्टी हो । त्यसैले कांग्रेसले लामो अनुभव गरेर त्यो निर्णय गरेको हो । नेपालको राजा कसैले पनि धोएर जति सफा गरे पनि उसलाई संवैधानिक बनाउन सक्दैन ।’
महामन्त्री थापाले निर्मल निवासमा बसेर उत्पात मच्याउने ज्ञानेन्द्रले नारायणहिटी दरबारमा बसेको भए के गर्थे होलान् भन्ने स्पष्ट भएको बताए । उनले राजतन्त्र फर्कने कुनै सम्भावना नरहेको बताए ।
