रविको मानव अधिकार रक्षाका लागि रास्वपाद्वारा मानव अधिकार आयोगको ध्यानाकर्षण
काठमाडौं । राष्ट्रिय स्वतन्त्र पार्टीले पार्टी सभापति रवि लामिछानेमाथि प्रहरीले ज्यादती गरेको भन्दै राष्ट्रिय मानव अधिकार आयोगको ध्यानाकर्षण गराएको छ ।
कार्यवाहक महामन्त्री कविन्द्र बुर्लाकोटी, प्रमुख सचेत सन्तोष परियारलगायतका नेताहरुले आयोगमा ज्ञापनपत्र बुझाएका हुन् । ज्ञापनपत्रमा उनीहरुले लामिछानेको मानव अधिकार रक्षाका लागि आयोगलाई आग्रह गरेका छन् ।
बुटवलको सुप्रिम सहकारी ठगीको आरोपमा गत शुक्रबार उच्च अदालत तुलसीपुरको बुटवल इजलासले लामिछानेलाई पुर्पक्षका लागि थुनामा पठाउन आदेश दिएको थियो ।
उच्च अदालतले जिल्ला अदालत रुपन्देहीले एक करोड धरौटीमा छाड्न दिएको आदेश बदर गर्दै पुर्पक्षमा पठाउन आदेश दिएपछि सोही दिन राति लामिछानेलाई प्रहरीले काठमाडौंस्थित निवासबाटै पक्राउ गरेको थियो । न्यायिक प्रक्रिया पूरा नगरी गैरकानुनी रूपमा रविलाई पक्राउ गरिएको उनीहरुको भनाई छ ।
लामिछानेलाई पक्राउ पुर्जी विना नियन्त्रणमा लिएको र प्रहरीले ज्यादती गरेको भन्दै रास्वपाले विरोध गर्दै आएको छ । उच्च अदालतको आदेशअनुसार रवि सोमबार भैरहवा कारागार चलान भइसकेका छन् ।
