सरकार विद्यालय शिक्षा ऐन ल्याउने कुरामा गम्भीर देखिएन, वार्ताको औचित्य छैनः शिक्षक महासंघ

काठमाडौं । नेपाल शिक्षक महासंघले अहिलेकै अवस्थामा वार्तामा बस्नुको औचित्य नभएको बताएको छ । बुधबार विज्ञप्ति जारी गरी महासंघले संसदको वर्षे अधिवेशन तत्कालै सुरु गर्ने, विशेष अधिवेशन आह्वान गर्ने वा अध्यादेश मार्फत् शिक्षा ऐन जारी गर्नुपर्ने सर्त अघि सारेको हो ।

शिक्षा मन्त्रालयले मंगलबार शिक्षकहरुलाई वार्तामा बोलाएको थियो । त्यसको जवाफमा महासंघले अहिलेकै अवस्थामा वार्तामा बस्नुको औचित्य नभएको बताएको हो ।

महासंघको विज्ञप्तिमा भनिएको छ, ‘विगतका सहमति कार्यान्वयन गर्ने सन्दर्भमा मन्त्रिपरिषदको निर्णयबाट सम्बोधन हुनसक्ने विषयमा शीघ्रातीशीघ्र निर्णय लिँदै ऐन जारी गर्नका लागि माथि प्रस्तावित विकल्पबारे स्पष्टताका साथ पहल भएमा वार्ताको विश्वसनीय वातावरण निर्माण हुने भएकाले त्यस्तो अवस्थामा मात्र महासंघ वार्तामा बस्न सक्ने कुरा स्पष्ट गर्दै विज्ञप्ति मार्फत् आह्वान भएको अहिलेको वार्तामा बस्नुको कुनै औचित्य नरहेको समेत प्रष्ट्याउन चाहान्छौं ।’ विद्यालय शिक्षा ऐन जारी गर्न माग गर्दै देशभरका शिक्षक चैत २० गतेदेखि काठमाडौं केन्द्रित आन्दोलनमा छन् ।