सशस्त्र प्रहरीद्वारा बारामा १० लाख रुपैयाँ भन्दाबढीको अबैध कपडा बरामद
काठमाडौं । बाराको जितपुर सिमरा उपमहानगरपालिका–२३ स्थित भलुवाहीबाट सशस्त्र प्रहरीले १० लाख ८ हजार रुपैयाँ बराबरको लत्ताकपडा बरामद गरेको छ ।
बा.प्र.०१–०२७ च ८५०३ नम्बरको टाटा पिकअप गाडीमा वीरगंज महानगरपालिका– १६ भुटनदेवी मन्दिर नजिकबाट २० बोरा लत्ताकपडा लैजान लागेको भन्ने विशेष सूचनाको आधारमा सशस्त्र प्रहरी नायब उपरीक्षक लोकेन्द्र सुब्बाको कमाण्डमा खटिएको सुरक्षा फौजले भन्सार छलीको कपडा र गाडी आइतबार नियन्त्रणमा लिएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए ।
गाडीलाई पिछा गर्दै आएपछि भलुवाहीमा गाडी छाडेर चालक फरार भएका थिए । बरामद कपडा वीरगंज भन्सार कार्यालयमा बुझाइएको सशसत्र प्रहरीले जनाएको छ । बरामद गरिएको लत्ताकपडाको मूल्य १० लाख ८ हजार रुपैयाँ रहेको सहप्रवक्ता थापाले बताए ।
