लरेन्स विश्नोईको नाममा व्यापारीसँग पाँच करोड भारु फिरौती माग्ने सुर्खेतका रामबहादुर बुढा क्षेत्री पक्राउ
काठमाडौं । भारतीय गुण्डा नाइके लरेन्स विश्नोई र अनमोल विश्नोईको नाम लिंदै फिरौती माग गरेको आरोपमा एक नेपालीलाई पक्राउ गरेको छ ।
बाँकेको कोहलपुरका एक व्यवसायीलाई धम्क्याउँदै पाँच करोड भारु मागेको आरोपमा प्रहरीले सुर्खेतको भेरीगंगा नगरपालिका–७, काठेपारी घर भई बाँकेको कोहलपुर नगरपालिका–५ बस्ने ४९ वर्षीय रामबहादुर बुढा क्षेत्रीलाई पक्राउ गरेको हो ।
प्रहरीकाअनुसार क्षेत्रीले विभिन्न विदेशी नम्बरको ह्वाट्सएप खोलेर त्यसको दुरूपयोग गर्दै विभिन्न व्यवसायीहरूलाई रकम माग्दै धम्क्याउने गरेका थिए । क्षेत्रीले आफूलाई लरेन्स बिस्नोई र अनमोल बिस्नोई भन्दै विभिन्न व्यवसायीहरूलाई म्यासेज पठाई ठूलो रकम माग्दै धम्क्याउने गरेको खुलेको छ। व्यवसायीको गुनासोका आधारमा प्रहरीले अनुसन्धान सुरू गरेको थियो ।
लरेन्स बिस्नोई एक भारतीय गुण्डा नाइके हुन् । उनी फिरौती माग्ने तथा हत्या आरोपमा सन् २०१४ देखि भारतीय जेलमा छन् । पक्राउ परेका क्षेत्री पटकपटक पक्राउ परेर मुद्दा चलेका व्यक्ति भएको प्रहरीले जनाएको छ ।
