‘एक हप्तामा हाम्रो कर्मचारीले तलब पाएनन् भने त्यसपछि हेरौँला तिमीहरुको के के तन्त्र हो!’
काठमाडौं । काठमाडौं महानगरपालिकाका मेयर बालेन साहले अबको एक हप्तामा आफ्ना कर्मचारीले तलब नपाए सबैलाई टुकुचामा गाडिदिने चेतावनी दिएका छन् ।
सोमबार राति सामाजिक सञ्जालमार्फत बालेनले अबको एक हप्ता भित्र कर्मचारीले तलब नपाए सबैलाई टुकुचामा गाड्ने चेतावनी दिएका हुन् ।
उनले भनेका छन्, ‘काठमाडौं महानगरपालिकाको सरसफाई कर्मचारीले बिगत ३ महिनादेखि तलब पाको छैन, सरकारको दम्भले ! को कोले के के आन्दोलन गर्ने हो, मलाई थाहा छैन , अबको एक हप्तामा हाम्रो कर्मचारीले तलब पाएन भने सबैलाई टुकुचामा गाडदिन्छु ! त्यो पछि हेरौँला तिमीहरुको के के तन्त्र हो!!’
सरकारले प्रमुख प्रशासकीय अधिकृत नपठाउँदा महानगरका कर्मचारीले तलब पाएका छैनन् । काठमाडौं महानगरपालिकाले प्रमुख प्रशासकीय अधिकृत सरोज गुरागाईंलाई गत पुस ५ गते काठमाडौं टावरको नक्सा स्वीकृतिमा अनियमितता गरेको भन्दै बिदामा पठाइएको थियो । त्यसपछि सरकारले महानगरमा प्रमुख प्रशासकीय अधिकृत पठाएको छैन ।
