सर्लाहीको लालबन्दीका १९ वटा स्वास्थ्य संस्था बन्द गर्न मुख्यमन्त्री सिंहको निर्देशन
जनकपुरधाम । मधेस प्रदेशका मुख्यमन्त्री सतिशकुमार सिंहले सर्लाहीको लालबन्दी नगरपालिकास्थित लालबन्दीचोक र नवलपुरचोकमा रहेका २३ वटा स्वास्थ्य संस्था अनुगमन गरेका छन् । मुख्यमन्त्री सिंहले शनिबार ती अस्पतालको अनुगमन गरेका हुन् ।
अनुगमनको क्रममा ती संस्थाहरूमा देखिएका अनियमितताका कारण १९ अस्पताललाई तत्काल बन्द गर्ने निर्देशन जारी गरिएको हो । यी अस्पतालहरू सेवा सञ्चालन अनुमतिपत्र बिना वा मापदण्डविपरीत सेवा दिइरहेको पुष्टि भएपछि यो कडा कदम उठाइएको मुख्यमन्त्री सिंहले बताए ।
सिंहले भने, ‘सर्लाहीको लालबन्दी नगरपालिकाका लालबन्दीचोक र नवलपुरचोकस्थित २३ वटा स्वास्थ्य संस्था अनुगमन गरेँ । तीमध्ये दुईवटासँग सेवा सञ्चालन अनुमतिपत्र दुरूस्त रहेको र दुईवटाले नवीकरण गर्नुपर्ने देखियो । सेवा सञ्चालन अनुमतिपत्र नरहेका र मापदण्डअनुसार सेवा सञ्चालन नभएका १९ अस्पताललाई बन्द गर्ने निर्देशन दिइएको छ ।’
मुख्यमन्त्री सिंहले स्वास्थ्य सेवामा गुणस्तर सुधार र अनुशासन कायम गर्न आवश्यक नीति तथा मापदण्डलाई कडाइका साथ पालना गराउने प्रतिवद्धता व्यक्त गरेका छन् । मधेश सरकारले स्वास्थ्य सेवाका मापदण्ड पालन नगर्ने संस्थाहरूलाई कडा कारबाही गर्ने नीति अगाडि सारेको छ ।
यसअनुसार अनुगमन प्रक्रिया निरन्तर जारी रहने र अब आउने दिनहरूमा झन् बढी सर्तकता अपनाइने मुख्यमन्त्री सिंहले बताए । मुख्यमन्त्री सिंहले मधेस प्रदेशका जिल्लाका निजी अस्पतालको पछिल्लो समय अनुगमन गरिरहेका छन् । अनुगमनका क्रममा अधिकांश अस्पताल मामदण्डविपरीत संचालन गरेको पाइएको छ ।
