विज्ञान प्रविधि नवप्रवर्तनतर्फ डा विराजसिंह थापा प्रधानमन्त्री राष्ट्रिय प्रतिभा पुरस्कारबाट पुरस्कृत
काठमाडौँ । विज्ञान प्रविधि नवप्रवर्तनतर्फ डा विराजसिंह थापा प्रधानमन्त्री राष्ट्रिय प्रतिभा पुरस्कारबाट पुरस्कृत भएका छन् ।
सरकारले राष्ट्रिय प्रजातन्त्र दिवस २०८१ का अवसरमा शान्ति, सुशासन, नवप्रवर्तन, वैज्ञानिक खोज, अनुसन्धान तथा विकासको क्षेत्रमा उल्लेखनीय योगदान पुर्याउने प्रतिभाशाली व्यक्तिलाई पुरस्कार दिने घोषणा गरेको थियो ।
सोही घोषणाअनुसार थापा शुक्रबार राष्ट्रिय प्रतिभा पुरस्कारबाट पुरस्कृत भएका हुन् । उनलाई प्रधानमन्त्री केपी शर्मा ओलीले पुरस्कार प्रदान गरेका थिए । उनी काठमाडौं विश्वविद्यालयको मेकानिकल इन्जिनियर विभागका सहप्राध्यापक हुन् ।
उनले हाइड्रोजनका क्षेत्रमा विशेषज्ञता हासिल गरेका छन् । उनको नेतृत्वमा नेपालमा पहिलो हाइड्रोजन कार निर्माण गरिएको थियो । थापा नेपाल सरकारको ग्रीन हाइड्रोजन नीतिको समन्वय समितिको सदस्यसमेत हुन् पुरस्कार प्राप्त गरेपछि थापाले यसले आफूलाई थप प्रेरणा दिएको बताएका छन् ।
उनले भनेका छन्, ‘यो पुरस्कार नेपालमा हरित हाइड्रोजन इकोसिस्टम विकास गर्ने मेरो दृष्टिकोण, समर्पण र उपलब्धिहरूका लागि प्रदान गरिएको हो । यस बिन्दुमा आइपुग्न प्रेरणा, मार्गदर्शन र समर्थनको लागि म अत्यन्तै आभारी छु।’
