चुच्चे नक्सामा समेटिएको क्षेत्रको भ्रमणमा जाने योजना छ ? भन्ने प्रश्नमा यस्तो छ प्रधानमन्त्रीको जवाफ
काठमाडौं । प्रधानमन्त्री केपी शर्मा ओलीले लिपुलेक, कालापानी र लिम्पियाधुरा भ्रमणमा जाने योजना नभएको बताएका छन् ।
बिहीबारको प्रतिनिधिसभा बैठकमा प्रधानमन्त्री ओलीले तत्काल लिपुलेक, कालापानी र लिम्पियाधुराको भ्रमणमा जाने योजना नरहेको बताएका हुन् ।
बैठकमा राप्रपा सांसद बुद्धिमान तामाङले प्रधानमन्त्रीलाई चुच्चे नक्सामा समेटिएको लिपुलेक, कालापानी र लिम्पियाधुरा कहिले जाने भन्दै प्रश्न गरेका थिए ।
जवाफमा प्रधानमन्त्रीले भने, ‘तत्काल त्यहाँ जाने योजना छैन, कुनै समयमा जान सकिन्छ । माननीयज्यूको जाने योजना छ ?’
इपीजी प्रतिवेदन नेपालले मात्रै बुझेर नहुने बताए । उनले भने, ‘पहिले नै पहिले भारतका प्रधानमन्त्रीले बुझ्ने अनि मात्र नेपालले बुझ्ने समझदारी भएको रहेछ । त्यसैले एक पक्षले मात्र बुझेर हुँदैन । दुई देशको मित्रतमा कहीँ कतै प्रतिकुल असर र अन्याय नहुने गरी सबै समस्याका दीगो समाधानका लागि इपीजी गठन गरिएको हो । यो प्रतिवेदन बुझ्ने सन्दर्भमा उच्चस्तरमा पहल भइरहेको छ । यो समझदारी ढंगले समाधान हुन्छ भन्ने विश्वास छ ।’
