धनुषामा एक महिलाको घरभित्रै गाडिएको अवस्थामा शव फेला, श्रीमान फरार
जनकपुरधाम । एक सातादेखि बेपत्ता भएकी धनुषाको लक्ष्मीनिया गाउँपालिका, बनिनियाकी २० वर्षीया अञ्जली यादवको घरमित्रै शव भेटिएको छ ।
अञ्जलीको शव आफ्नै घरको पूजाकोठामा गाडिएको अवस्थामा भेटिएको हो । सुरूमा अञ्जलीका श्रीमान रामहरिले अञ्जली हराएको भनेर गाउँलेहरूलाई भनेपनि त्यसको दुई दिनपछि १० महिनाकी छोरीसहित उनी आफैं बेपत्ता भएका छन् । श्रीमान पनि बेपत्ता भएपछि स्थानीयले प्रहरीलाई खबर गरेका थिए ।
त्यसपछि अनुसन्धानका क्रममा शनिबार दिउँसो अञ्जलीको शव उनकै घरको पूजाकोठाभित्र गाडिएको अवस्थामा भेटिएको जिल्ला प्रहरी कार्यालय धनुषाका डीएसपी वरुणबहादुर सिंहले जानकारी दिए ।
प्रहरीकाअनुसार शव सडेगलेको अवस्थामा भेटिएको छ । अञ्जलीको शवलाई उत्खनन् गरेर पोस्टमार्टमका लागि प्रादेशिक अस्पतालमा पठाइएको छ । घटनाका विषयमा थप अनुसन्धान र बेपत्ता श्रीमानको खोजी भइरहेको प्रहरीले जानकारी दिएको छ ।
