तनहुँको बन्दीपुरमा एमालेका वडाध्यक्षद्वारा सचिवमाथि कुटपिट
दमौली । कार्यक्रमको बिल स्वीकृत नगरेको भन्दै तनहुँको बन्दीपुर गाउँपालिका वडा नम्बर ६ का अध्यक्ष बलबहादुर गुरुङले वडा सचिवमाथि कुटपिट गरेका छन् ।
वडाध्यक्ष गुरुङले सोमबार सचिव नवीन भुसालमाथि कुटपिट गरेका हुन् । वडास्तरीय भलिबल कार्यक्रमको बिल स्वीकृत गर्न नमानेको भन्दै वडाध्यक्ष गुरुङले आफूमाथि कुटपिट गरेको वडासचिव भुसालले बताए । घटनाको आठ घण्टापछि प्रहरीले वडाध्यक्ष गुरुङलाई पक्राउ गरेको छ ।
सोमबार बिहान कार्यालय आएर वडाध्यक्षले वडास्तरीय भलिबल कार्यक्रमको बिल स्वीकृत गर्न भनेका थिए । तरसचिव भुसालले कार्यक्रम स्वीकृत नगरिएकाले र शीर्षक नखुलाई आएकाले विल स्वीकृत गर्न नसक्ने बताएका थिए । त्यसपछि उनले सचिवलाई कुटपिट गरेका थिए ।
