नेपालको डिजिटल प्रणाली विस्तारमा सहयोग गर्न स्टोनिया इच्छुक
काठमाडौँ । उत्तरपश्चिमी युरोपेली मुलुक इस्टोनियाले नेपालको डिजिटल प्रणाली र साइबर सुरक्षामा सहयोग गर्न इच्छा व्यक्त गरेको छ ।
नेपालका लागि स्टोनियाका अवैतनिक वाणिज्य दूत नवराज दाहालसँगको भेटमा त्यहाँका परराष्ट्र मन्त्रालयका उच्च अधिकारीले त्यस्तो इच्छा प्रकट गरेका हुन् ।
भेटमा स्टोनियाको परराष्ट्र मन्त्रालयअन्तर्गत मानव अधिकार र आप्रवाशनसम्बन्धी विभाग प्रमुख केटरिन किभीले डिजिटल प्रणालीको प्रयोग, विस्तार र साइबर सुरक्षाको क्षेत्रमा सहयोग गर्न चाहेको अवैतनिक वाणिज्य दूत दाहालले जानकारी दिए ।
स्टोनियाका अधिकारीले ई–गभर्नेन्स र साइबर सुरक्षासम्बन्धी विज्ञलाई नेपाल पठाएर सरकारी कर्मचारी, निजी क्षेत्र (बैंकिङ र गैरबैंकिङ) तथा नेपालका विभिन्न विश्वविद्यालयमा सूचना प्रविधि (आइसिटी) विषय अध्ययनरत विद्यार्थीलाई व्यावसायिक तालिम दिन सकिने बताएको दाहालले जानकारी दिए ।
