सरकारले पाथीभरा घटनामा घाइते भएकाहरूको उपचार खर्च ब्यहोर्ने
काठमाडौं । ताप्लेजुङको पाथीभरामा केबलकार निर्माणको विषयमा भएको झडपका क्रममा घाइते भएकाहरूको उपचार खर्च सरकारले ब्यहोर्ने भएको छ ।
मंगलबार सिंहदरबारमा गृहमन्त्री, जनप्रतिनिधि, सुरक्षा निकायका प्रमुखसहितको बैठकले घाइतेको उपचार खर्च ब्यहोर्ने निर्णय गरेको हो । बैठकले घटनाबारे थप बुझेर समाधानका लागि वार्ता समिति पनि गर्ने निर्णय गरेको गरेको छ ।
पाथीभरामा सोमबार केबुलकार निर्माणको विषयमा स्थानीय र प्रहरीबीच झडप भएको थियो। त्यसक्रममा प्रहरीले चलाएको गोली लागेर दुई जना घाइते भएका थिए। त्यस्तै भागदौडमा एक जना गम्भीर घाइते भएका छन् । पाथीभरामा केबुलकार निर्माणको काम रोक्न स्थानीयले माग गर्दै आएका छन् ।
‘नो केबुलकार समूह’ को नामबाट सोमबार प्रदर्शनमा उत्रिएका स्थानीय र प्रहरीबीच झडप समेत भएको थियो । घटनाबारे मंगलबार गृहमन्त्री रमेश लेखकले आइजिपी वसन्त कुँवरसँग पनि ब्रिफिङ लिएका थिए । मुक्कुमलुङ संरक्षण र केबुलकार खारेजी संघर्षरत संस्थाका प्रतिनिधिहरूले १५ माघदेखि अनिश्चितकालीन बन्द आह्वान गरेका छन्।
