लेखा समिति सभापतिका स्वकीय सचिव विराटनगरबाट पक्राउ
विराटनगर । संसदको सार्वजनिक लेखा समितिका सभापति ऋषिकेश पोखरेलका स्वकीय सचिव अनिल पोखरेल पक्राउ परेका छन् ।
प्रहरीले पोखरेललाई बिहीबार बिहान विराटनगरबाट पक्राउ गरेको हो । जिल्ला प्रहरी कार्यालय मोरङका प्रवक्ता डिएसपी वेदप्रकाश जोशीले पोखरेललाई पक्राउ गरिएको र अब अनुसन्धान सुरु हुने जानकारी दिए ।
पोखरेलमाथि एबीबीबीएस पढ्न छोरीको नाम निकालिदिने भन्दै सप्तरीको अग्निसाइबर कृष्णासवरन गाउँपालिका– ५ बकधुवाका बौआलाल चौधरीसँग विभिन्न मितिमा ३८ लाख ८० हजार रुपैयाँ लिएको आरोप छ । घटना सार्वजनिक भएपछि सभापति पोखरेलले स्वकीय सचिवलाई गतसाता बर्खास्त गरेका थिए ।
सहकारी ठगी प्रकरणमा सभापति पोखरेलकी पत्नी अञ्जला फरार रहेकोमा बुधबार अदालतमा उपस्थित भएकी थिइन् । अदालतले कोइरालालाई १० लाख धरौटीमा रिहा गर्ने आदेश दिएको थियो । धरौटी बुझाएर उनी बुधबारै रिहा भएकी थिइन् ।
