लेखा समिति सभापतिका स्वकीय सचिव अनिल पोखरेलविरुद्ध पक्राउ पुर्जी जारी
विराटनगर । संसदको सार्वजनिक लेखा समितिका सभापति ऋषिकेश पोखरेलका स्वकीय सचिव अनिलकुमार पोखरेलविरुद्ध पक्राउ पुर्जी जारी भएको छ । जिल्ला अदालत मोरङले सोमबार पोखरेलविरुद्ध पक्राउ पुर्जी जारी गरेको हो ।
मोरङ जिल्ला अदालतका सूचना अधिकारी हेमबहादुर बुढाथोकीले पोखरेलविरुद्ध ठगी मुद्दामा पक्राउ पुर्जी जारी गरेको जानकारी दिए ।
पोखरेलले सप्तरीका बौआलाल चौधरीबाट एमबीबीएसको प्रवेश परीक्षामा उत्तीर्ण गराइदिने भन्दै २०७१ देखि ०७३ का बीचमा पटकपटक गरेर ३८ लाख ८० हजार लिएको आरोप छ । यो विषय सार्वजनिक भएपछि गत शुक्रबार सभापति पोखरेलले स्वकीय सचिवलाई बर्खास्त गरेका थिए ।
