एमालेले प्रतिशोध साँधेकाले शान्ति प्रक्रियाले गति नलिएको प्रचण्डको आरोप
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीको केन्द्रीय समिति बैठकमा राजनीतिक प्रतिवेदन पेस गरेका छन् ।
आइतबारदेखि सुरु भएको बैठकमा अध्यक्ष प्रचण्डले राजनीतिक प्रतिवेदन पेस गरेका हुन् । प्रतिवेदन पेस गर्दै अध्यक्ष प्रचण्डले चन्दा र कमिसनमा रमाउने नेता कार्यकर्तालाई उत्पादन र श्रममा फर्काउनुको विकल्प नभएको बताएका छन् ।
उनले पार्टीभित्र चरम व्यक्तिवादी अराजकता मौलाएको र यसबाट नेतृत्वलाई अप्ठ्यारो परिरहेको बताएका छन् ।
उनले केपी ओली नेतृत्वको सरकार आफैँ नांगिँदै गएको आरोप लगाएका छन् । उनले भने, ‘ मेरो नेतृत्वको सरकारले सुरू गरेका कामलाई यो सरकारले पन्छाउँदै गइरहेको छ । केपी ओली सरकार आफैँ नांगिदै गइरहेको छ ।’
प्रचण्डले एमालेले प्रतिशोध साँधेकाले शान्ति प्रक्रियाले गति लिन नसकेको बताएका छन् । उनले आगामी फागुन १ भित्र सबै केन्द्रीय सदस्यले सम्पत्ति विवरण बुझाउनुपर्ने प्रस्ताव गरेका छन् ।
उनको प्रस्ताव भनिएको छ, ‘फागुन १ गतेसम्ममा सबै सीसीएमहरुले आफू र परिवारको सम्पत्ति विवरण बुझाउनु पर्ने र जीवननिर्वाहको स्रोत खुलाउनु पर्ने ।’
