पार्टी नेतृत्वले पञ्चकै नक्कल गर्योः उषाकिरण तिम्सिना
काठमाडौं । नेकपा एमालेकी नेतृ उषाकिरण तिम्सिनाले आफूविरुद्धको पार्टीले गरेको कारबाहीप्रति आपत्ति जनाएकी छन् । बुधबार पार्टी सचिवालय बैठकले ६ महिना निलम्बन गर्ने निर्णयप्रति उनले आपत्ति जनाएकी हुन् ।
सामाजिक संजालमार्फत उनले कारबाहीलाई ‘पञ्चायतविरुद्ध लडेर आएको नेतृत्वले पञ्चकै नक्कल गरेको टिप्पणी गरेकी छन्। उनले भनेकी छन्, ‘आजै पनि आफ्नो जिम्मेवारी भएको नुवाकोट निर्वाचन क्षेत्र नम्बर एक अन्तरगत शिवपुरी गाँउपालिका कमिटीको सपथ ग्रहण कार्यक्रम थियो । उक्त कार्यक्रम सकेर भर्खर घर आइपुगेको छु । तल्लो तहका आमकार्यकर्ता, तिनको लगाव, मेहनत र चासोको अगाध माया लाग्छ । यता ६ महिना निलम्बनको निर्णय भएछ । पञ्चायतविरुद्ध लडेर आउनु भएको नेतृत्वगणले पञ्चकै नक्कल नगर्नु भएको भए हुन्थ्यो ।’
पार्टी कार्यालय बनाउन व्यवसायी मीनबहादुर गुरुङसँग जग्गा दान लिने निर्णयको उनले विरोध गरेकी थिइन् । त्यसपछि पार्टीले उनलाई स्पष्टीकरण सोधेको थियो । तर स्पष्टीकरण चित्तबुझ्दो नभएको भन्दै एमालेले उनलाई बुधबार ६ महिनाका लागि निलम्बन गर्ने निर्णय गरेको छ ।
