मोरङमा युवतीको सामूहिक बलात्कार घटनामा संलग्न तीन पक्राउ
विराटनगर । प्रहरीले मोरङको जहदा गाउँपालिकाकी २३ वर्षीया युवतीको हातखुट्टा बाँधेर बलात्कार गरेको आरोपमा तीन जनालाई पक्राउ गरेको छ ।
बाँसको झाङबाट अर्धअचेत अवस्थामा उद्धार गरिएकी महिलाको बयानका आधारमा प्रहरीले तीन जनालाई पक्राउ गरेको छ । पक्राउ पर्नेमा कटहरी गाउँपालिका–२ का १९ वर्षीय मोहम्मद रमजान सोही स्थानका १९ वर्षीय सोनुकुमार साह र भारतको अररीया कुशाकट्टा बस्ने १९ वर्षीय मोहम्मद गुल्जार छन् ।
मंगलबार जहदा गाउँपालिका–३ की २३ वर्षीया युवती घरदेखि करिब दुई किलोमिटर टाढा कटहरी गाउँपालिका–२ मा पर्ने खेतबारीको बीचमा रहेको बाँसको झ्याङमा सलले मुख थुनेर हातखुट्टा बाँधेको अवस्थामा अचेत अवस्थामा फेला परेकी थिइन् । ‘मर्निङ वाक’मा निस्किएकी उनी मंगलबार बलात्कारमा परेकी थिइन् । अहिले उनको विराटनगरस्थित कोशी अस्पतालमा उपचार भइरहेको छ ।
