लामो रस्साकस्सीपछि त्रिभुवन विश्वविद्यालयमा आठ र तीन निर्देशक नियुक्त
काठमाडौं । त्रिभुवन विश्वविद्यालयका आठ जना डीन र तीन जना कार्यकारी निर्देशक नियुक्त भएका हुन् । त्रिभुवन विश्वविद्यालयको कार्यकारी परिषद्ले शनिबार आठ जना डीन नियुक्ति गरेको रजिस्ट्रार केदार प्रसाद रिजालले जानकारी दिएका छन् ।
मानविकी तथा सामाजिकशास्त्र संकायको डीनमा प्रा.डा. दुबिनन्द ढकाल, चिकित्साशास्त्र अध्ययन संस्थानमा प्रा.डा. मोहनराज शर्मा, कृषि तथा पशुविज्ञान अध्ययन संस्थानमा डा. किशोरचन्द्र दाहाल, शिक्षाशास्त्र संकायमा प्रा.डा. बेदराज आचार्य, वन विज्ञान अध्ययन संस्थानमा डा. ठाकुर सिलवाल, व्यवस्थापन संकायमा प्रा.डा. महानन्द चालिसे, इन्जिनियरिङ अध्ययन संस्थानमा प्रा.डा.सुशिल बहादुर बज्राचार्य र विज्ञान तथा प्रविधि अध्ययन संस्थानमा प्रा.डा. शंकर खनाल नियुक्त भएका छन् ।
त्यस्तै योजना निर्देशनालयका निर्देशकमा डा. लक्ष्मीकान्त शर्मा नियुक्त भएका छन् भने शिक्षा, विकास तथा अनुसन्धान केन्द्रको कार्यकारी निर्देशकमा डा. राजेन्द्र कुँवर र व्यावहारिक विज्ञान तथा प्रविधि अनुसन्धान केन्द्र कार्यकारी निर्देशकमा प्रा.डा. मिना राजभण्डारी नियुक्त भएका छन् ।
त्रिविका डीन नियुक्तिलाई लिएर प्रधानमन्त्री केपी शर्मा ओली र उपकुलपति केशरजंग बरालबीच रस्साकस्सी भएको थियो । लामो विवादपछि डिन र कार्यकारी निर्देशक नियुक्त भएका हुन् ।
छनोट समितिले सिफारिस गरेका तीन जनामध्ये पहिलो नम्बरमा रहेकालाई गर्ने कि अर्को छान्ने भन्नेमा विवाद थियो । वर्णानुक्रम अनुसार नाम भएकाले तीन जनामध्ये एक जना छान्ने नीति परिषद्ले लिएको हो । प्रधानमन्त्री एंव त्रिविका कुलपति ओलीले ७ पुस भित्र नियुक्ति गर्न निर्देशन दिएका थिए ।
