लिलावल्लभ जोडिएको मुद्दामा तीन जना जेल चलान, तीन धरौटी र दुई साधारण तारेखमा रिहा
काठमाडौं । जापानमा मानव तस्करी गरेको आरोपमा कोसीका पूर्वमन्त्री लिलावल्ल्भ अधिकारीसँगै पक्राउ परेका अन्य तीन जना पुर्पक्षका लागि जेल चलान भएका छन् ।
शुक्रबार जिल्ला अदालत काठमाडौंका न्यायाधीश बलराम लम्सालको इजलासले धादिङ त्रिपुरासुन्दरी गाउँपालिका–६ का ३४ वर्षीय महेश पाण्डे, नुवाकोटको विदुर नगरपालिका–७ का २२ वर्षीय जुगल रिजाल र दोलखाको जिरी नगरपालिका–९ का ३० वर्षीय वीरबहादुर सुनुवारलाई पुर्पक्षका लागि जेल चलानको आदेश दिएको हो ।
अदालतले तीन जनालाई धरौटीमा र दुई जनालाई साधारण तारेखमा रिहा गर्न आदेश दिएको अदालतका श्रेस्तेदार रामु शर्माले जानकारी दिएका छन् ।
अदालतले पूर्वमन्त्री अधिकारीसँगै जापान पुगेका खोटाङको केपिलासगढी गाँउपालिका ४ का ४१ वर्षीय जनक राई, खोटाङकै ऐँसेलुखर्क गाँउपालिका–२ का ३७ वर्षीय दावा शेर्पा र रसुवाको कालिका गाँउपालिका–५ का २१ वर्षीय कन्चन देवकोटालाई जनही ५० हजार धरौटीमा रिहा गर्न आदेश दिएको छ ।
अदालतले नक्कली कागजात तयार गरेको आरोपमा पक्राउ परेका खोटाङका ४१ वर्षीय नवीन राई र ३२ वर्षीया गुड्डी राईलाई साधारण तारेखमा रिहा गर्न आदेश दिएको छ ।
यो मुद्दामा विष्णु भट्टराई, दिवाकर भट्टराई र गौपाल गौतम भने फरार छन् । पक्राउ परेका पूर्वमन्त्री अधिकारीलाई प्रहरीले मुद्दा चलाउन सुझाव दिएपनि सरकारी वकिलको कार्यालयले भने मुद्दा नचलाउने निर्णय गरेको थियो ।
